Сэтгэлийн хөндүүртэй тэр нэгэнд

Хэнгэнэтэл шүүрс алдах нэгний

Сэтгэлийн хөндүүрийг мэдэрлээ

Хэлтгий гишгэсэн мөр нь толбо  болоод зурайчихаж

Хээнцэр цэцэг шиг дүр нь ишин дээрээ гудайчихаж

Хэлэхэд ч бэрх зовлон түүнд тохиолдсон гэнэм

Хэзээ хамгийн сүүлд ийм уйтай бороо шивэрлээ дээ

Хэтэрхий оройтсон зэмлэлд хүлээстэй өнжлөө гэнэ

 

Сергей Александрович.Есенин танаа

Сэтгэлийн гүнээс өргөх шүлэг минь энэ ээ
Сэрүүн бүрхэг энэ л өдөр хөргийг тань ширтэхэд
Сүмийн уйтгарт ая эгшиглэх шиг намуухан агаад
Сэмрэх бодолд минь ариуслын салхи хөвөлзөж байна

 

Хойд насандаа цэцэг болж төрөхгүй

Уул уулсын энгэрт чимэг болж
Урсах голын эргээр өнгө нэмж
Учралт хосын болзоонд бэлэг болж
Урд насандаа нэгэн цэцэг байлаа би